ســـــــــــــــبيكة من الشمس
حرت بيا وكت اكتبلك اني اليوم
وبغــفـله لكيت ابين اديه الحل
وي خيط الفجر حسيت بيك الهام
لأن وجه الفجر يشبهك من يهل
سبيكه من الشمس شعرك ذهب منثور
نازل للخصر عالورك يتــدنـــدل
جبينك نص كمر واكف غصب مجبور
لأن جوه الكمر حاجبك سيف انسل
عينك .. خل اكول بسرعه لاتعليق
خاف اتخربط انه من اوصف وتخجل
لاترمش بعد كدامي اترجاك
ابرد من تهفي رموشك اتخلخل
واذا سال الدمع من عينك ابجي وياك
واذا بالصين واكف خدي يتبلل
يل شلت بخدودك برتقال وخوخ
وفراوله اعله الشفايف والطعم يذهل
فواكه كلك انت واعتقد مخلوط
وي خمره وسهر نركيلة ومعسل
سكرت بخلقتك من شفك انجنيت
اذا تضحك مصيبه شلون من تزعل
لزمت اهروشي بيدك واكطعتني بطيب
سنابل كلبي ذابت بيك يلمنجل
يل عندك نحر شميته جن هروين
صار ادمان عندي وجسمي اتحلحل
اتوسل اضل كلما اشوفك جاي
شمه انطيني منك مدمن اتوسل
صدرك طاغي كلش عالبشر مغرور
واكف لاينام بليل لايذبل
يا اجمل خصر يتكسر بممشاك
صفقه ويه الورك من تمشي يتبدل
يل رجلك ثلج عالركبه شلت شموس
ثلج ويه الشمس يعني الثلج ينحل
بياض الدنيه غركت والسبب رجليك
غطتنه بسحرهه من الحسن تكتل
اذا حته الاضافر رسم عالأقدام
ومنحوت القدم عالساق متفصل
بعد كلي شبقه .. جفك اضن ناسيه
متعمد نسيته شبيـــــــــــك لاتجفل
جفك ما اوصفه كبال هاي الناس
بعدين انه اكلك جفك شيحمل
وانه مقصر بعد و اعذرني ماوفييت
لأن يمعوود انته بشعر ماتكمل .
الجمعة أغسطس 22, 2008 1:48 am