--------------------------------------------------------------------------------
قصيده عراقيه لكل من يكره الطائفيه
إذا لا سمح الله الحرب شبت بيك
كلمن ما تهدى إيكوم يتعذر
العراق إنته شهم كل هالشظايا البيك
وبياض البلعلم ما عفته يدمر
يا لون الشرف يا كل وقار الشيب
يا أول عدل كل يوم يتوذر
ما تنكص ركبتك منه حتى السيف
على ركبت السيف السيف يتحذر
عينك بالغضب يتغطه منهه الموت
وتعمه من البجي لو طفل يتعور
عمال المساطر فجروهم بيك
خافو بيهم المهدوم يتعمر
خافوا من صورهم تنعكس بالماي
رادوا وجه مايك لونه يتغير
وحاروا بالكبب من عدهه راسك وين
شكو بالجبيرة الراس يتفجر
مو كبة الهادي راسك المطلوب
لأن ليشوفهم جن توم يتصور
تبا للحرب حتى بسمانه إجروح
كفاكم هذا خاين ذاك يتكفر
أحس إسممت من ريحتة البارود
أريد أشتم هوى بضحكات يتعطر
أصابعنه إدمنت خلي الزناد ايهيد
مد إيدك علي خل نطبك الرايات
ونخلي العدو بوكفتنه يتحير
إحنه أهل الوطن بينه المراجل ساس
مو منه بنوايا الغير يسير
حلفني بعمر وآني بعلي الكرار
أحلفك ما تريد الوطن يتعمر
متريد الدمع يهجر جفون العين
متريد الكسر بضلع يتجبر
متريد الطفل يعرف شنو الوردات
ويتناسه الشظايا المنهه يتستر
طولنه الزعل وإمشابك الخوان
العراق إسنين صار إلهاي يتنطر
الجمعة أغسطس 22, 2008 1:38 am